Top sekuriteitsbeamptes in Frankryk sê hulle het 'n Islamitiese jihadis in Parys gearresteer wat 'n aanval op ten minste een kerk beplan het. In 'n perskonferensie Woensdag sê die land se minister van binnelandse sake die verdagte - wie se naam nog nie bekend gemaak is nie - is 'n 24-jarige Algerynse rekenaarwetenskapstudent. Hy is Sondag in hegtenis geneem nadat hy homself per ongeluk geskiet en ’n ambulans ontbied het. Dit is toe dat die polisie 'n arsenaal wapens en notas oor potensiële teikens in sy motor gevind het. Dokumente het sonder enige onduidelikheid bewys dat die individu 'n dreigende aanval teen een of twee kerke voorberei. Intussen het premier Manuel Valls Franse burgers daaraan herinner dat die land 'n ongekende terreurbedreiging in die gesig staar, en gesê 'Terroriste teiken Frankryk om ons te verdeel en ons reaksie moet wees om burgers te beskerm en saam te staan terwyl ons terrorisme in die gesig staar'. Sien ook artikel 1 in die Europa-afdeling.