Foto's wys grondverskuiwings en verwoeste moddergeboude huise waar redders skarrel om mense te vind wat onder die grond begrawe is en die beseerdes in die dodelikste aardbewing in twintig jaar te behandel. Op 22 Junie het mense begin om meer as 1 000 dooies te begrawe en meer as 1 500 beseerdes te help. Die Taliban-leierskap het 'n beroep op die internasionale gemeenskap gedoen om enige hindernisse wat deur sanksies geskep word uit die weg te ruim en hulle te hulp te kom . Kommunikasie is moeilik omdat selfoontorings beskadig is, en die dodetal kan nog verder styg waar wonings in landelike gebiede onstabiel of swak gebou is. Selfs voor die Taliban-oorname was Afghanistan se nooddienste uitgerek om natuurrampe te hanteer. 'n Dokter van Paktika-provinsie het gesê mediese werkers is onder die slagoffers: 'Ons het nie genoeg mense en fasiliteite gehad voor die aardbewing nie, en nou het dit die bietjie wat ons gehad het verwoes. Ek weet nie hoeveel van ons kollegas leef nog nie.' Sommige het verbasing uitgespreek omdat die Taliban gesê het hul reddingsoperasie is voltooi, minder as 48 uur ná die aardbewing.