Youtube het 'n preek oor seksualiteit deur die Amerikaanse pastoor John MacArthur verwyder. Die preek het hul 'haatspraakbeleid' geskend toe hy gesê het 'daar is nie iets soos transgender nie. Jy is óf XX óf XY'. MacArthur se opmerkings het betrekking op Kanada se wetgewing, Bill C-4, wat op 8 Januarie wet geword het. Sommige pastore en kerkleiers vrees dit kan lei tot die verbod op preke oor Bybelse seksualiteit. Christelike organisasies sê die bewoording van die wetsontwerp is so wyd dat dit gebruik kan word vir 'die kriminele vervolging van Christene wat Bybelse waarheid praat'. Vierduisend predikers het hul teenkanting teen die wetsontwerp bevestig en hul bereidwilligheid om daarteen uit te spreek. Die konserwatiewe kommentator Todd Starnes het gesê: 'YouTube het die Kanadese wet bevestig deur enige opposisie teen transgenderisme op hul platform te verbied, en dit sal nie baie lank duur voordat die seks- en geslagsrevolusionêre die bron van ons oortuigings teiken - die Heilige Bybel nie.'